Ish-ministri i Jashtëm grek Nikos Kotzias, ka bërë një deklaratë të guximshme. Në një intervistë për media greke ESIEA ai zbuloi se kishte dërguar në Prokurori raste të diplomatëve grekë të përfshirë në çështje të paligjshme.
Ai ka bërë një deklaratë “bombastike”, ku është shprehur se diplomatët grekë kanë lëshuar viza për fëmijë të pashoqëruar.
Sipas tij, këto fëmijë janë lejuar të kalojnë të pashoqëruar pasi kanë rënë në rrjetat e trafikantëve që merren me shitje organesh.
Ish-ministri u shpreh se ka punuar shumë kundër botës së krimit dhe se ka dërguar në Prokurori 93 raste.
“Nuk pajtohem se nuk kemi bërë asgjë. 93 raste i kam dërguar Prokurorit për shkelje të kodit penal dhe disa diplomatë kanë përfunduar në burg për dhënie vizash për fëmijë të pashoqëruar. A e dini se çfarë do të thotë viza për fëmijë të pashoqëruar? Do të thotë trafikim organesh. Dhe vetëm unë i kam shpëtuar disa shpirtëra dhe tani mund të fle i qetë gjithë jetën time”, tha ish-Ministri i Jashtëm./TIRANA TODAY/
