Diskutimet mes Shqipërisë dhe Greqisë duket se kanë dhënë fryte pozitive, ndërsa janë shtuar gjasat e një optimizmi se të dyja vendet do të gjejnë gjuhën e përbashkët për të zgjidhur problemet e së shkuarës. Kotzias ka folur pas takimit 3-ditor të mbajtur në qytetin e Korçë me homologun shqiptar Ditmir Bushati, një takim i cili ishte vijimësi e takimit të Kretës.
Sipas tij, raundi i dytë i diskutimeve ishte një hap i madh, i cili do të çojë përpara marrëdhëniet mes vendeve, ndërkohë tryeza e diskutimeve ka mundur të zgjidhë mosmarrëveshjet mes Greqisë dhe Shqipërisë për pikat më të nxehta.
Shefi i diplomacisë greke ka konfirmuar largimin e konflikteve të hershme, ndërsa shtoi se bisedimet e Korçës pritet të certifikohen në takimin mes dy kryeministrave, i cili është njoftuar se do të mbahet në muajin prill.
Ai tha se kemi arritur marrëveshje të cilat s’janë arritur për 70 vjet me Shqipërinë, duke lënë të kuptohet se është i kënaqur nga ky takim në qytetin e Korçës.
“Kemi arritur marrëveshje që nuk janë arritur gjatë këtyre 70 viteve midis Shqipërisë, jam i kënaqur për rezultatet e marrëveshjes. Qeveria shqiptare kishte guximin të votonte për dy ligje ekzekutive (bazuar në marrëveshjen e vitit 2009) dhe për të filluar procedurat e kërkimit dhe të zhvarrosjes së ushtarëve grekë”-shprehet ai.
