Ministri i Jashtëm i Maqedonisë Nikolla Dimitrov i tha homologut të tij nga Kosovar Bexhet Pacollit, se Maqedonia do të jetë neutrale për anëtarësimin e Kosovës në UNESCO. Dimitrov nuk dëshironte të hidhërojë as Kosovën, e as Serbinë, prandaj tha se do të donin që të jenë anash këtij procesi.
Dimitrov: Maqedonia këtë çështje e shqyrton me kujdes të veçantë pasi është çështje që ndan dy fqinjë tanë…Ne nuk duam të luajmë rol kyç në këtë çështje pasi pikërisht, tangon dy fqinjë tanë…Do e kemi parasysh interesin e miqve të Kosovës, Serbisë por do të sjellim vendim duke u bazuar edhe në interesin e qytetarëve të Maqedonisë, përfshirë këtu atë të shqiptarëve të Maqedonisë”
Pacolli nuk e komentoi këtë deklaratë të ministrit për çështjen e UNESCO-s pasi ishte i fokusuar në fjalimin e shkruar që duhej ta lexonte për të përshëndetur harmoninë politike ndëretnike të Maqedonisë, pa specifikuar se çfarë nënkuptonte me këtë përkufizim.
Pacolli: Ka qenë një hap tepër i mirë që Qeveria e Maqedonisë të jetë shumë ngjyrëshe, shumë etnike…Si Kosovë gjithmonë kemi përcjellë çdo lëvizje politike. Sot ne jemi të lumtur që ka një harmoni politike ndëretnike që ne e përshëndesim
Ministri i jashtëm kosovar Pacolli theksoi nevojën e krijimit të një zone të përbashkët ekonomike dhe heqjen e tatimeve për prodhime të Maqedonisë në Kosovë dhe anasjelltas. Dimitrov nga ana tjetër paralajmëroi së shpejti një mbledhje të përbashkët të dy Qeverive të Kosovë dhe Maqedonisë.
