Kryeministri i Kosovës, Ramush Haradinaj ka hapur dyert për të gjithë shqiptarët e Kosovës të rekrutuar në Siri dhe Irak, të cilët kanë luftuar në krah të ISIS.
Gjatë prezantimit të raportit të UNDP-së rreth faktorëve shtytës dhe tërheqës për kosovarët që marrin pjesë në luftëra të huaja, Haradinaj tha se Kosova është e gatshme të riatdhesojë ata që duan të kthehen.
Po ashtu, kryeministri i Kosovës shtoi se përhapja e ideologjive ekstremiste fetare në Kosovë ka ardhur si rrjedhojë “hapjes së Kosovës” pas përfundimit të luftës, por tashmë kosovarët i kanë mësuar efektet e ideologjive ekstremiste:
“Kosova është atdhe i të gjithëve dhe jemi të gatshëm t’i riatdhesojmë të gjithë që duan të kthehen. Kosova e merr përgjegjësinë që ta sigurojë jetën e të gjithëve.
Nuk mundet askush që t’i mashtrojë në pakufi qytetarët e Kosovës me ideologji. Kosovarët e kanë kuptuar se këto janë ideologji të rrejshme që bëhen me qëllim të manipulimit të qytetarëve tanë”, tha ai.
Raporti i publikuar nga UNDP përfshin intervista me të dënuar nga gjykatat e Kosovës për pjesëmarrje në luftërat e huaja dhe me familjarë të tyre.
Në këtë raport thuhet se procesi i largimit të kosovarëve drejt Sirisë ka nisur në vitin 2012 dhe ka vazhduar edhe më tej deri në vitin 2015.
Deri më tani mbi 60 kosovarë janë vrarë në frontet e luftës në Siri e Irak, ndërsa mbi 120 janë kthyer në Kosovë.
