Prokuroria e Posaçme ka nisur hetime mbi dyshimet për shitblerje të paligjshme të energjisë elektrike, të kryera nga KESH me urdhër të zv/kryeministres Belinda Balluku, që është gjithashtu ministre e Infrastrukturës.
Hetimet u hapën pas një kallëzimi të bërë nga Gazment Bardhi, kreu i grupit të PD-së, i cili u shpall i pafajshëm nga gjykata për shpifje, pasi ishte kallëzuar nga OSHEE.
Në një intervistë televizive mbrëmjen e djeshme, Balluku komentoi vendimin e gjykatës, duke theksuar se akuzat nuk shkojnë drejt saj dhe se deklaratat e Bardhit ishin padashje, pasi ai nuk ka ekspertizë në çështjet e energjisë. Ajo shtoi se gjykata e shpalli Bardhin të pafajshëm për shpifje, pasi ai është vetëm politikan dhe nuk ka ekspertizë energjetike.
Nga ana tjetër, avokati i deputetit demokrat, Marash Logu, e cilësoi deklaratën e Ballukut si një gënjeshtër. Ai sqaroi se gjykata nuk ka thënë që Bardhi nuk ka ekspertizë në energji, por ka shpallur pafajësinë e tij për shpifje. Logu e sfidoi Ballukun të shpjegonte ku kishin shkuar 180 milionë euro të shqiptarëve dhe e cilësoi situatën si një formë të korrupsionit të madh.
“Zëvendëskryeministrja Belinda Balluku gënjeu kur tha se “Gjykata ka thënë se Gazment Bardhi nuk ka ekspertizë nga energjia.”.
Në asnjë rast Gjykata nuk ka thënë diçka të tillë, por vetëm ka shpallur dispozitivin: 1. Rrëzimin e kërkesës penale të OSHEE Group sh.a. 2. Deklarimin e pafajshëm të të akuzuarit Gazment Bardhi për veprën penale “Shpifja” parashikuar nga neni 120 i Kodit Penal. Për këtë zonja Balluku mund të pyesë edhe avokatin e OSHEE që ishte i pranishëm në sallë.
As gjykata dhe as SPAK nuk kanë thënë këtë gjë. Përkundrazi kanë thënë që sjellja dhe denoncimet e z. Bardhi duhet të shërbejnë si nxitje për çdo deputet, sepse janë përmbushje serioze e funksionit të deputetit që denoncon çdo abuzim me detyrën.
Edhe një herë znj. Balluku, apeli i zotit Bardhi për ty është mos keqpërdor vartësit, por bëhu gati që në SPAK t’u shpjegosh qytetarëve ku kanë shkuar 180 mln euro të shqiptarëve. Ky është KORRUPSION MADHOR”, shkruan Logu.
