Në Korçë do të përballen ditën e sotme në sfidën e fundit të javës së 7-të të Kategorisë Superiore dy rivalët më të mëdhenj të viteve të fundit. Skënderbeu do të presë në shtëpi Kukësin, për ti treguar forcën se vazhdon të jetë pretendenti kryesor për të triumfuar. Nga ana tjetër Kukësi shkon me objektivin që ky është viti i tyre dhe se do të vazhdojë ecurinë e fitoreve.
Armando Cungu është rikthyer në pankinën e Kukësit dhe ka rikthyer në kamp qetësinë dhe vazhdimësinë e rezultateve, pasi verilindorët vijnë në këtë sfidë nga katër fitore radhazi. Nga ana tjetër, për skuadrën e Orges Shehit, tri pikët janë detyrim, pas asaj disfate me Teutën javën e kaluar, që vuri në pikëpyetje serioze forcën korçarëve për të mbrojtur titullin.
Ndaj dhe kjo sfidë konsiderohet provë forcë për t’i treguar opinionit sportiv se Skënderbeu do të jetë aty, deri në fund, për të tentuat titullin e radhës, edhe pse nuk do të vlejë për të marrë pjesë në Champions sezonin e ardhshëm.
Në Skënderbeu-Kukësi barazimi nuk është opsion për të dyja skuadrat, sepse Partizani është shkëputur në krye dhe ndarja e pikëve do të ndikonte pak në renditje. Kukësi aktualisht ka 3 pikë më pak të kuqtë, ndërsa korçarët, brenda 2 javëve të fundit kanë humbur plot 5 pikë ndaj rivalëve kryeqytetas. Sfida e Korçës është mjaft interesante edhe për faktin se dy trajnerët Shehi dhe Cungu përplasen për herë të parë në pankinë, edhe pse shkodrani ka avantazhin e eksperiencës më të madhe.
