Organizata për Bashkëpunim Ekonomik dhe Zhvillim (OECD) ka publikuar një raport për certifikimin e vendeve të Europës Juglindore dhe sa konkurruese janë ato në tregun global.
Këto të dhëna u publikuan në kuadër Ditës së Konkurrueshmërisë, ndërsa dëshmojnë për një situatë jo pozitive për Shqipërinë.
Raporti i OECD:
“Numri i certifikatave të regjistruara të Organizatës Ndërkombëtarë të Standardizimit është një masë që tregon integrimin në zinxhirin global të vlerës dhe elasticitetin e investimeve. Certifikatat funksionojnë si një produkt i veçantë, ose shërbim apo sistem që është në përputhje me kërkesat dhe standardet. Ato mundësojnë tregtinë ndërkufitare, për të hyrë në ekonominë globale, duke mundësuar që operacionet e biznesit të jenë eficiente dhe të rritet produktiviteti i kompanive. Në rajonin e Europës Juglindore, numri i certifikatave ISO 9001 të regjistruara, për milion banorë është më i ulët se në Bashkimin Europian. Serbia ka nivelin më të lartë ndërsa Shqipëria, Maqedonia dhe Mali i Zi më të ulëtin”, thuhet në raport, shkruan Monitor.
Shifrat sot:
Por si qëndron në fakt Shqipëria në një raport më të gjerë se rajoni për certifikatat ISO? Të dhënat e fundit të publikuara nga Organizata Ndërkombëtare e Standardeve tregojnë se, në raport me numrin e popullsisë, ne mbetemi të fundit. I dyti në listë është Mali i Zi dhe i treti Maqedonia.
Rekordin për nivelin më të lartë të certifikatave ISO 9001 në raport me numrin e numrin e popullsisë e mban një nga partnerët kryesorë tregtarë tanët, Italia.
Organizata Ndërkombëtare e Standardizimit nuk është institucioni që lëshon këto të fundit, por vetëm mban bazën e të dhënave për ato certifikata që lëshohen nga trupa të pavarur që kanë fituar të drejtën e dhënies së këtij shërbimi kundrejt një tarife.
Sa më shumë certifikata të zotërojë një biznes, aq më të vogla janë barrierat që has në tregun ndërkombëtar, pasi në bazë të marrëveshjeve tregtare, certifikatat njihen si garanci për plotësimin e standardeve dhe cilësisë.
