Egzon Binaku dhe Giacomo Vrioni ishin dy futbollistët e kombëtares të cilët ishin në konferencën për shty në prag të ndeshjeve me Jordaninë dhe Izraelin. Mbrojtësi i Malmo është shprehur i lumtur që pas dy ndeshjeve me Skocinë dhe Izraelin një muaj më parë trajneri Panucci e kishte grumbulluar sërish.
“Atmosfera në skuadër është e mirë. Të gjithë lojtarët i kemi të mirë. Ndaj Izraelit do të hyjmë në fushë vetëm për të fituar. Me Skocinë nuk kemi luajtur shumë mirë. Megjithatë, tashmë e dimë se çfarë duhet të bëjmë për të triumfuar. Sigurisht kemi dëshirë të kualifikohemi në grup, në Ligën e Kombeve. Duhet të jemi psikologjikisht mirë. Personalisht jam shumë i kënaqur që më kanë ftuar në kombëtare, që trajneri ka sërish besim tek unë”, u shpreh Binaku.
Ndërsa sulmuesi i Venezias është shprehur i sinqertë se vendosi të bashkohet me kuqezinjtë pasi nuk kishte ardhur ftesa e Italisë edhe pse është vetëm 19-vjeç.
“Ftesa më erdhi papritur, pasi kam zhvilluar vetëm një ndeshje me U-21. Nuk e besoja, por jam i lumtur. Kam luajtur me grup-moshat e Italisë më parë, por nuk më thirrën më. Më pas fola me prindërit dhe zgjodha fanellën kuqezi.
A do të luaj? Zgjedhjet i takojnë trajnerit, ndërsa unë do të mundohem të jap më të mirën në fushë, nëse më jepet mundësia. Qëllimi im është të luaj sa më shumë dhe të shënoj. Megjithatë, objektivi na kërkon që të jemi të gjithë bashkë, për të arritur sërish në kampionatin Europian.
Sulmuesi im i preferuar është Sadiku, ndërsa me dëmtimin e tij, nga kombëtarja aktuale më pëlqen Balaj. Si tifoz e shoh kombëtaren shumë mirë. Me Izraelin ishte një ndeshje e bukur, ndërsa Skocia është një skuadër e fortë. Pastaj, atje ishte edhe ndeshje në transfertë”.
Në fund ai zbuloi se ëndërron që një ditë të luajë për Interin pasi zikaltrit janë skuadra që ai bën tifozllik.
