Një nga futbollistët që ka përçuar gjithnjë frymën e grupit dhe të bashkëpunimit në Kombëtaren Shqiptare, ka folur për momentin aspak të mirë që po kalojnë kuqezinjtë.
Ansi Agolli ka komentuar situatën në Kombëtare, ku bën thirrje për reflektim të të gjitha palëve, ndërsa shton se nuk i intereson qëndrimi apo largimi i Panuccit.
Ish-kapiteni i Kombëtares, i pagrumbulluar për këto dy ndeshje, në një intervistë për “Panorama Sport”, tha se gjithçka duhet të merret me qetësi, duke mos vënë gishtin tek askush për situatën e kuqezinjve.
Pjesë nga intervista
Agolli, nuk mund të ketë pyetje tjetër në këtë situatë veçse çfarë po ndodh me Kombëtaren?
Nuk besoj se duhet të themi shumë fjalë për rezultatet e Kombëtares. Rezultati i fundit na ka zhgënjyer të gjithëve. Megjithatë, unë mendoj se është momenti për pak qetësi nga skuadra. E them këtë, pasi e shoh ambientin shumë të acaruar me këto rezultate. Gjë e cila nuk ndihmon aspak, e mbi të gjitha djemtë e rinj të cilët janë të shumtë në përfaqësuese apo e veshin për herë të parë fanellën e Kombëtares dhe ndaj bëj thirrje për më shumë qetësi dhe më shumë reflektim.
Ju përmendni reflektim, ndoshta duhet që të nisë që nga drejtimi dhe mënyra si është drejtuar Kombëtarja deri më tani?
Pa diskutim që pas një humbjeje të tillë duhet të ketë patjetër reflektim, të merret gjithçka me qetësi. Megjithatë, unë nuk e kam këtë me dikë, me një emër, por e them në përgjithësi që është moment reflektimi.
Çfarë doni të thoni atëherë?
Shikoni, gjithmonë kur ka disa rezultate negative radhazi, nevojitet një moment reflektimi për çfarë po ndodh. Unë e them këtë duke shtuar që gjithçka duhet bërë me qetësinë e duhur
Panuçi erdhi me filozofinë që skuadra ka cilësi për të luajtur në sulm. Me çfarë kemi parë, mos ndoshta duhet që Shqipëria të rikthehet te loja e kujdesshme që të marrë rezultatet?
Shqipëria ka trajner dhe ai i di më mirë këto çështje. Më mirë sesa unë, ndaj nuk besoj se çfarë mund të them unë të ketë më shumë vlerë. Nuk ka kuptim që unë të komentoj punët e trajnerit. I përket atij të vendosë.
