Pak orë pas fitores 2-0 me Lihtenshtejnin, kuqezinjtë zhvilluan një seancë stërvitore në “Elbasan Arena”, ku u angazhuan më së shumti ata të cilët nuk luajtën.
Në takimin e radhës pritet të jetë i gatshëm Armando Sadiku, i cili kaloi një gjendje gripale dhe nuk u aktivizua të shtunën. Misioni tani është ndeshja me Maqedoninë që do të luhet në stadiumin e vogël të Strumicës.
Gjashtë vite më parë një miqësore u zhvillua në Prilep ku pati probleme nga tifozeria vendase. Odise Roshi, që mbrëmë shënoi golin e parë, nuk ruan kujtime të mira të asaj kohe. Ai ishte në fushë dhe sjell ndërmend koret raciste.
“Atmosfera nuk ishte aq e mirë, pasi kishte disa thirrje raciste. Shpresojmë që kësaj here të jetë e qetë”.
Strumica u zgjodh si zona më e qetë. Kombëtarja do të mbështet nga pak më shumë se 400 tifozë. Synohet fitorja e tretë radhazi, por e rëndësishme është të mos largohen pa pikë.
“Për çdo ekip më e mira është 3 pikshi, por kur del me pikë nga ndeshjet jashtë fushë është gjithsesi pozitive”, thotë Roshi.
Azdren Lullaku, i cili u aktivizua si sulmues kryesor me Lihtenshtejnin mendon se Maqedonia është një kundërshtar i fortë.
“Maqedonia do të jetë më e vështirë, sepse është një ekip më i mirë se Izraeli”.
Një fitore me Maqedoninë të martën do të forconte pozitat e Shqipërisë në vendin e tretë në grup. Stërvitja në “Elbasan Arena” ishte e fundit e kombëtares në Shqipëri. Deri të hënën, ekipi do të stërvitet në Shkup.
