Korpusi i ri i ndryshimeve të Kodit te Procedurës Penale ka kaluar jo me vëmendjen e duhur, kjo edhe për shkak të zhvillimeve të fundit politike.
Sipas ekspertit të nivelit të lartë, njëkohësisht dhe dekanit të fakultetit të Drejtësisë, Artan Hoxha, rishikimet do të sjellin një praktikë krejt të re të proceseve penale, por dhe funksionimit të Prokurorisë, e cila tashmë është decentralizuar. Mes shumë ndryshimeve është dhe kërkesa për gjykim të shkurtuar. Në jo pak procese, persona të akuzuar për krime të rënda kanë përfituar nga gjykimi i shkurtuar. Por, tashmë, neni 403 i Kodit të Procedurës Penale ka ndryshuar tërësisht.
“Me ndryshimet që i janë bërë kodit, nuk lejohet gjykimi i shkurtuar për veprat penale që parashikojnë dënim, ndër të tjera edhe dënimin me burgim të përjetshëm. Do të thotë së ata persona që kanë kryer vepra penale, të cilat parashikojnë dënim përjetë, atëherë gjykimi i shkurtuar nuk është i aplikueshëm.” – tha dekani i fakultetit të Drejtësisë, Hoxha.
Risi të tjera janë dhe elementët e shtuar për seancën e gjykimit paraprak apo dhe dispozitat për marrëveshjen.
“Ne kemi futur dy gjykime të reja të posaçme, që është urdhëri penal për kudravajtjet penale, gjykimi me marrëveshje që përcaktohet përmes prokurorit dhe të pandehurit… mënyra e përfundimit të hetimeve paraprake, që ka të bëjë me futjen e një figure të re, që është gjyqtari i seancës paraprake, i cili kontrollon të gjithë veprimtarinë që është zhvilluar nga prokurori dhe nevojës ose jo të kalimit të çështjes për gjykim.” – tha Hoxha.
Për sa i përket debatit mbi rishikimin e vendimeve të pafajësisë, Hoxha thotë se mendimi juridik është i ndarë.
“Europa ka zgjidhje të ndryshme. Ka shtete që e pranojnë rishikimin e vendimeve të pafajësisë, ka shtete që nuk e bëjnë, duke dashur të garantojën që procesi penal të ketë një fund, që siguria juridike ka rëndësi për vetë procesin dhe shoqërinë…” – u shpreh Hoxha.
Ndryshime rrënjësore ka pësuar edhe Kodi Penal. Mes tyre janë vendimet, të cilat parashikojnë deri në dy vite heqje lirie, për të cilat tashmë do të aplikohet masë administrative gjobe apo dënim alternativ. / VizionPlus
