Roma mposhti me lehtësi Viktoria Plzen me rezultatin e thellë 5-0 në sfidën e vlefshme për Champions League. Speciale kjo natë ishte për të riun Justin Kluivert, i cili u bë lojtari i dytë më i ri holandez që debuton si titullar në Champions. Por përpos kësaj Kluivert ka shënuar edhe një gol ku vëmendjen më të madhe e ka marrë festa që ka bërë djaloshi.
Holandezi, i cili u transferua këtë verë në kryeqytetin italian, më parë ka qenë aktivizuar me Ajax. Momentin e golit Kluivert e festoi me një dedikim ndaj ish-shokut të tij të skuadrës tek Ajax, Abdelhak Nuri. I biri i Patrik Kluivert mban mbi shpinë gjithashtu numrin 34, në nder të mikut të tij. Pas golit të shënuar Kluivert tregoi përpara të gjithë tifozëve fanellën e Romës, me numrin 34 dhe me emrin e Nuri mbi fanellë.
Historia e trishtë e Nuri pothuajse dihet nga të gjithë. Ish-talenti i Ajax, vitin e shkuar, më saktë në korrik, në një miqësore ndaj Werder Bremen, pësoi një atak kardiak. Pasi u transportua në spital dhe nën kujdesin e mjekëve, Nuri pësoi dëmtime të mëdha në tru. Mesfushori ishte në koma për një kohë të gjatë, deri në muajin gusht të këtij viti, ku nga familjarët e tij u tha që 21-vjeçari ka një përmirësim.
