Nga John Feffer “Lobelog”/ Rusia, Koreja e Veriut dhe Arabia Saudite, janë anëtarët më të fundit të një klubi ndërkombëtar të përzgjedhur. “Vrasësit pa Kufij” ka rrënjë të vjetra në histori, sërish në kohën moderne, në politikat e Bashkimit Sovjetik, Kilit, Izraelit, Bullgarisë dhe Shtetet e Bashkuara.
Të gjitha këto vende, kanë një tipar të përbashkët:Janë të gatshme të sfidojnë të drejtën ndërkombëtare, në mënyrë që të vrasin kritikët dhe kundërshtarët e tyre në vende të tjera. S’ka asnjë vlerësim të drejtë të provave. Asnjë proces korrekt gjyqësor. Thjesht hiqje qafe e tyre nga distance!
Ashtu siç ka bërë edhe Arabia Saudite– sikurse pretendohet – ndaj njërit prej kritikëve të saj të brendshëm. Regjimi saudit, ka qenë prej disa kohësh i pakënaqur me gazetarin Xhamal Kashogi. Opinionisti i prestigjiozes amerikane “The Washington Post”, kishte qenë më parë një besnik i regjimit, para se të vendoste se Princi i Kurorës saudite, Muhamed bin Salman, e kishte shkelur vijën e kuqe.
Ai u largua nga vendi, dhe shkoi të jetojë në Shtetet e Bashkuara, ku nisi të ndërmarrë sulme në distancë. Regjimi vendosi të reagojë po në distancë. Kashogi nuk ishte një disident amator. Ai i njihte sekretet e regjimit. Dhe ishte i vendosur t’i shkaktonte dëmin maksimal imazhit të mbretërisë. Autoritetet saudite kishin diskutuar tashmë një plan, për ta joshur Kashogin të kthehej sërish në vend për ta gjykuar.
Por kur ai hyri në konsullatën saudite në Stamboll, për të marrë dokumentacionin që i nevojitej për martesën e tij, Kashogi iu nënshtrua diçkaje tjetër:marrjes në pyetje, torturave dhe ekzekutimit nga një ekip prej 15 personash të dërguar nga Riadi. Vrasja e një gazetari të mirë-njohur që së fundmi banonte në Shtetet e Bashkuara, është një veprim i rrezikshëm.
Administrata Trump, pretendon se e ka marrë këtë çështje shumë seriozisht, edhe pse vetë Trump vetë ka sugjeruar se ndoshta ishte një grup vrasësish, që u fut në konsullatën saudite në Stamboll për të kryer ekzekutimin, dhe se të gjithë janë të pafajshëm, derisa të jetë vërtetuar se janë fajtorë.
Vrasja e sponsorizuar nga shteti, është një bast i pamëshirshëm. Por vendet e tjera janë mësuar me to. Pa dyshim, Arabia Saudite pret që “stuhia” të kalojë, dhe bota t’i avitet sërish Riadit, në ndjekje të naftës, investimeve dhe intrigave gjeopolitike. Tek e fundit, kjo ka ndodhur edhe në Korenë e Veriut
Vitin e kaluar, regjimi Kim Jong-un dërgoi agjentët e vet në Malajzi për të vrarë Kim Jong Nam, gjysmë-vëllain e tij më të madh. Agjentët, punësuan bashkëpunëtorë indonezianë dhe vietnamezë, të cilët thanë se mendonin se ajo që po bënin ishte një shaka për një spektakël televiziv, duke i injektuar agjentin nervor VX, vëllait fatkeq të lideri koreano-verior.
Ai vdiq rrugës për në spital. Sipas zbulimeve nga Korea e Jugut, që nga momenti që mori kontrollin e vendit, Kim Jong-un, donte që vëllai i tij të vdiste. U deshën plot 6 vjet, që ai ta realizonte këtë dëshirë. Vrasja nxiti njëfarë zemërimi global. Dy bashkëpunëtoret gra në në Malajzi u nxorrën në gjyq. Por ato pretendojnë ende se janë të pafajshme.
Ndërkohë Kim Jong Un, po takohet me liderët botërorë, si me koreano-jugorin Moon Jae-in dhe Donald Trumpin në Singapor. Ai madje mund të fitojë çmimin Nobel për paqen, nëse luan “kartat” e tij të duhura. Padyshim që Arabia Saudite ka marrë leksione nga e shkuara.
Rusia ka qenë më agresive në përndjekjen e kritikëve të saj. Agjentët rusë, përdorën poloniumin për të helmuar dhe vrarë ish-agjentin e KGB-së Alexander Litvinenko në Londër në vitin 2006.
Ajo përdori një agjent nervor, në një përpjekje për të vrarë Sergei Skripal dhe vajzën e tij në Salisbëri të Anglisë, një sulm që edhe Donald Trump e pranon tani se ka të ngjarë të ketë qenë një komplot i Kremlinit. Por Putini nuk beson në vrasjen e vetëm një personi, si një formë paralajmërimi për të tjerët.
Ai e bën gjithçka me tepri. Kujtoni pak rastin e Mikail Lesin, themeluesin e rrjetit “Russia Today”. Ai ishte gati t’u rrëfehej agjentëve të FBI në Uashington në vitin 2015 kur u zbulua, pak para intervistës së planifikuar, i vdekur në dhomën e tij në një hotel. Fillimisht, policia mendoi se bëhej fjalë për një vdekje aksidentale, e shkaktuar nga rënia nga shkallët në gjendje të dehur. Por agjentët e FBI-së, besojnë se ai rrahur deri në vdekje.
Por as Arabia Saudite dhe Rusia, nuk “mbajnë flamurin” në këtë aspekt. Historia sugjeron ndryshe. Në vitin 1940, Stalini realizoi më në fund një nga dëshirat e tij të zjarrta:vrasjen e njërit prej kundërshtarëve më të zëshëm të tij jashtë vendit, Leon Trockit, në Meksikë.
Stalini do të jetonte edhe 13 vite pas kësaj, dhe stalinizmi “vdiq” efektivisht bashkë me të.
Në vitin 1976, agjentët e diktatorit kilian Augusto Pinoçet vrasin Orlando Letelier, ish-ambasador në Shtetet e Bashkuara nën qeverinë e majtë të Salvador Alendes. Pinoçeti, do të binte nga pushteti dhe do të vdiste nën arrest shtëpiak, me akuza të shumta për shkelje të të drejtave të njeriut.
Në vitin 1978, agjentët bullgarë përdorën majën e helmuar të një ombrellë, për të vrarë shkrimtarin disident Georgi Markov në Londër. Regjimi komunist i Bullgarisë së Todor Zhivkovit, zgjati vetëm 11 vite të tjera. Stalin, Pinoçet, Zhivkov:historia nuk ka treguar asnjë mëshirë ndaj tyre. Ndërkohë, Arabia Saudite mund të shikojë një seri të ndryshme rastesh historike.
Për shembull, Izraeli ka vrarë një numër të madh qytetarësh të shtetit të saj, palestinezët. Kohët e fundit, Izraeli ka vrarë mbi 200 banorë të Gazës, që nisën të protestonin marsin e shkuar në enklavën e tyre, duke kërkuar të drejtën për t’iu rikthyer në tokat e tyre të shpronësuara.
Edhe Shtetet e Bashkuara, janë përpjekur dhe herë pas here, dhe kanë arritur të vrasin udhëheqës jashtë shtetit.
Por vetëm në vitin 2011, ajo vrau 3 qytetarë amerikanë, Anëar Al-Awlaki, të birin 16-vjeçar dhe Samir Khan, gjatë një sulmi ajror kundër një baze militantësh ekstremistë. Por administrata e Obamës, nuk u përball me asnjë pasojë për këtë vrasje ekstra-gjyqësore.
Në një kohë kur populistët e krahut të djathtë duan të mbyllin kufijtë për të parandaluar hyrjen e emigrantëve, refugjatët dhe azilkërkuesit, një lloj tjetër njerëzish që kapërcejnë kufirin, e ka më të lehtë për ta bërë këtë:vrasësit. Nëse Arabia Saudite distancohet nga mizoritë e saj të fundit, klubi i “Vrasësve pa kufij”, do të gjejë së së shpejti shumë anëtarë të rinj.
Përashtati për Tirana Today, Alket Goce
