Newcastle është një klub me histori shumë të respektueshme në Angli. Por, në vitet e fundit “Qymyrxhinjtë”, kanë humbur disi shkëlqimin e tyre. Megjithatë, plani i bardhezinjve është të kthehen sërish protagonist teksa pritet që në vijim të ketë edhe një ndryshim të pronësisë që do të sjellë më shumë zhvillim sa i përket futbollistëve që do afrohen dhe teknikut që do e marrë klubin përsipër.
Kështu, një fond saudit me në krye Amanda Staveley do të shpenzojnë 400 milionë euro për të marrë në duar klubin, ndërsa synimi i presidencës së re është Massimiliano Allegri. Tekniku italian është i papunë pas aventurës me Juventus, por e ka deklaruar se në sezonin pasardhës do rikthehet të ushtrojë profesionin.
Livornezi ka pasur oferta edhe nga klube të tjera të Premier League, apo PSG, por, projekti i Newcastle mund ta joshë. Pronarët e rinj garantojnë një merkato cilësore për të kthyer ekipin në majë. Mbetet tashmë për t’u parë nëse ky projekt i ri do të bindë ish-trajnerin e Juve dhe Milan, ndërkohë që në listën e Newcastle është edhe Rafa Benitez.
