KLSH denoncon vonesat në përditësimin e shërbimeve online, si institucionet publike mbyllin sytë dhe AKSHI hesht, ja dëmet për qytetarët dhe bizneset
Kontrolli i Lartë i Shtetit (KLSH) ka evidentuar mangësi serioze në përditësimin në kohë të shërbimeve online nga institucionet publike, duke ndikuar drejtpërdrejt te qytetarët dhe bizneset. Në raportin e fundit, KLSH thekson se vonesat në reflektimin e ndryshimeve ligjore në formularët elektronikë penalizojnë përdoruesit dhe nuk kanë pasur asnjë reagim nga (Agjencia Kombëtare e Shoqërisë së Informacionit) AKSHI.
Ndër institucionet që kanë dërguar me vonesë të theksuar dokumentacionin janë DPSHTRR, Drejtoria Detare dhe Ministria e Infrastrukturës dhe Energjisë, me raste deri në 2 vite vonesë. Për më tepër, AKSHI nuk ka marrë masa për këto shkelje, duke zbehur besimin te eficenca e administratës digjitale. KLSH i ka rekomanduar Agjencisë së Shoqërisë së Informacionit dhe Agjencisë për Dialog që të monitorojnë rregullisht institucionet publike për respektimin e afateve dhe përditësimin në kohë të shërbimeve online.
Detajet
Konkretisht institucionet publike të cilat ofrojnë shërbimet e tyre online në platformën e qendërzuar për të cilën përgjegjëse është Agjencia Kombëtare e Shoqërisë së Informacionit kanë dërguar në disa raste me vonesë ndryshimet ligjore që duhet të reflektohen në formularët elektronike përkatëse. Kontrolli i Lartë i Shtetit në raportin e fundit të publikuar këtë prill mbi zbatimin e rekomandimeve të lëna për shërbimet online nënvizon se përditësimi duhet të shihet me prioritet duke e monitoruar me raporte periodike.
Kjo sipas KLSH do të shmangte vonesat e për rrjedhojë nuk do të penalizonte bizneset dhe individët. “Në lidhje me korrespondencën shkresore të institucioneve shtetërore me Agjencinë Kombëtare të Shoqërisë së Informacionit u konstatuan: -Mos respektimi i afateve ligjore në kohë në lidhje me detyrimin që institucionet shtetërore kanë për sjelljen e ndryshimeve ligjore të cilat duhet të reflektohen në formularin elektronik nga Agjencia Kombëtare të Shoqërisë së Informacionit, që të mos penalizohen qytetarët dhe bizneset” thuhet në raport. Konkretisht sipas KLSH ato që kanë pasur vonesa të konstatuara janë:
Drejtoria e Përgjithshme e Shërbimeve të Transportit Rrugor, ka dërguar me rreth 2 vite vonesë formatin elektronik për miratimin e lejes së re të qarkullimit të mjeteve rrugore nga dalja e Urdhrit nr. 284, datë 07.10.2020 “Për miratimin e lejes së re të qarkullimit të mjeteve rrugore”;
Drejtoria e Përgjithshme Detare ka përcjellë shkresën me nr. 7997.prot., datë 21.12.2022, në zbatim të Udhëzimit nr.16, datë 20.07.2022 të Ministrit të Infrastrukturës dhe Energjisë “Për përditësimin e shërbimit që lidhet me aplikimin për regjistrim dhe pajisje me pasaportë detare dhe aplikimin për regjistrim dhe pajisje me pasaportë detare për shtetas shqiptarë, të huaj, pa shtetësi” rreth 6 muaj me vonesë;
Ministria e Infrastrukturës dhe Energjisë në zbatim të urdhrit të Ministrit të Infrastrukturës dhe Energjisë nr. 61, datë 05.06.2012, i rishikuar me urdhrat nr. 432/1, datë 17.02.2017 dhe nr. 392, datë 29.12.2020, ku është kërkuar implementimi i dy shërbimeve: Aplikim për kualifikim si kandidat për pilot, Aplikim për regjistrim dhe pajisje me certifikatë për pilot; Ka dërguar në Agjencia Kombëtare e Shoqërisë së Informacionit, shkresën me nr. 5479.prot., datë 06.09.2022, rreth 1 vit e gjysmë me vonesë, në mos respektim të afateve ligjore.
“Për sa më sipër nga Agjencia Kombëtare e Shoqërisë së Informacionit nuk u konstatuan masa të marra në lidhje me vonesat e institucioneve në sjelljen e kërkesave me ndryshimet e përditësimet përkatëse në informacionin dhe formularin elektronik të publikuar” nënvizoi KLSH. Në këtë kontekst raporti ka rekomanduar që Agjencia Kombëtare e Shoqërisë së Informacionit në bashkëpunim me Agjencinë për Dialog dhe Bashkëqeverisje të hartojë raporte monitorimi periodike në lidhje me institucionet shtetërore për respektimin nga ana e tyre ndaj afateve kohore për të mundësuar përditësimin e formularëve elektronikë sipas ndryshimeve të legjislacionit respektiv.
