Liverpool shkatërroi në “Anfield” Yllin e Kuq të Beogradit në kuadër të Champions League me rezultatin e thellë 4-0. Lojtari më i mirë i ndeshjes u zgjodh Xherdan Shaqiri, i cili luajti për 70 minuta. Ai dha një pasim kyç për golin e parë dhe asistoi për Salah në golin e dytë, paraqitje fantastike të cilën e ka vlerësuar maksimalisht dhe Jurgen Klopp.
Ndërsa pas dy javësh do të zhvillohet ndeshja e kthimit, e cila do të luhet në Beograd dhe për futbollistin me kombësi shqiptare do të jetë një “ferr”. Trajneri Klopp është shprehur se është duke e menduar seriozisht këtë çështje: “Deri tani nuk e kisha menduar, prandaj bën logjikë që përpara se të shprehem publikisht, duhet ta shqyrtoj si problematikë”, deklaro Klopp.
Nga ana tjetër, drejtori i përgjithshëm i klubit Ylli i Kuq i Beogradit, Zvezdan Terzic në një intervistë dhënë për gazetën serbe “Kurir”, deklaroi se Shaqirit do t’i ofrohej mbrojtje nga situate të padëshiruara, por spekuloi se mesfushori mund të mos dëshirojë që të luajë. “Unë mendoj se Shaqiri do të jetë nën presion të paimagjinueshëm psikologjik, sepse ai e di se ku po vjen. Ai e di shumë mirë që Ylli i Kuq është një simbol i Serbisë dhe të luajë në “Marakana”, nuk e di nëse ai do të luajë” deklaroi Terzic.
Por vetë Shaqiri e ka të qartë atë që e pret dhe ka marrë një vendim, ai është shprehur: “E kam provuar këtë gjë tashmë në Botëror, kështu që e përballojë këtë problem. Sapo lexova disa artikuj kur një lojtar fliste për këtë gjë. Por, nuk shqetësohem çfarë thonë njerëzit. Dua të shkojë atje dhe të luaj futboll. Nuk ka të bëj me politikë, ka të bëj me futboll. Nuk shqetësohem për asgjë, dua të shkojë atje dhe të luaj”.
