Jurgen Klopp nuk e pranon barazimin që mori ndaj Tottenham, aq më keq në atë mënyrë me një penallti në sekondat e fundit. Trajneri i “The Reds” në konferencën pas ndeshjes ka shpërthyer ndaj arbitrit John Moss, duke u shprehur se ai kishte dëshirë të jetë në qendër të vëmendjes dhe ia doli.
Ishte Mohamed Salah ai që zhbllokoi ndeshjen që në minutën e 3’, duke vendosur me atë gol deri në minutën e 80’, pasi 10’ minutat e fundit ishin të pabesueshëm. Wanyama barazoi në fund të takimit, ku filloi edhe një histori më vete. Harry Kane humbi një penallti të dyshimtë përpara se Salah të shënonte një gol fantastik në kohën shtesë. Por arbitri Moss jep një tjetër penallti për Spurs në sekondat e fundit të ndeshjes pas faullit të Van Dijk ndaj Lamela-s. Këtë herë Kane nuk shpërdoron duke shënuar golin e 100-të në Premier League.
Klopp ishte i zhgënjyer dhe konfuz nga vendimet e arbitrit, që janë vërtetuar tashmë se kanë qenë të drejtë, tha se Moss donte të merrte qendrën e vëmendjes. “Nuk e keni marrë vesh? Nuk mund t’i afrohem dhomës së tyre deri gjysmë ore pas ndeshjes,” shprehet Klopp për Sky Sports kur pyetet nëse i kishte ardhur një ndjesë nga zyrtarët.
“Ishte një pozicion jashtë loje i qartë në penalltinë e parë, e pabesueshme, nuk e di se çfarë po diskutonin. Po, Van Dijk e preku por Lamela po kërkonte kontaktin. Ky ishte niveli i ndeshjes së sotme, por më pas një situatë në sekondat e fundit në atë mënyrë? Wow. Ai donte të ishte në qendër të vëmendjes, dhe ia doli.”
