Si pasojë e një vendimi të ministrisë së Shëndetësisë, ka një mungesë totale të informacioneve lidhur me të dhënat e sakta të aborteve pas vitit 2014.
Situata është krijuar për shkak të vendimin të ministrisë në 2013-ën, që vendosi delegimin e aborteve drejt materniteteve shtetërore.
Shqetësimi u ngrit nga UNFPA (United Nations Population Fund Albania) gjatë një tryeze, ku u vu theksi se ky vendim ka sjellë një nënraportim të rasteve të aborteve nga klinika private:
“Sipas raportimeve vetëm 10% e rasteve janë bërë në sektorin privat. Kjo tregon se ka fshehje të të dhënave nga klinikat private dhe si kërkesë e adoleshentëve dhe prindërve të tyre për të ruajtur anonimatin. Të miturat japin moshën dhe emër tjetër kur regjistrohen”, vlerëson UNFPA.
Edhe zv/ministri i Shëndetësisë, Klodjan Rrjepaj pranoi se vendimi i atëhershëm ishte një masë e nxituar dhe nuk u mor në bashkërendim me institucionet e tjera që do të mundësonin zbatimin e tij.
“Marrja e këtij vendimi erdhi në të njëjtën kohë me krijimin e inspektoriatit shtetëror shëndetësor. ISHSH është një institucion i ri dhe nuk i ka kapacitetet e nevojshme për të ushtruar kontrolle si dhe përvojën e njohuritë e duhura për ta bërë këtë”, u shpreh Rrjepaj.
