Këshilli Kombëtar i Territorit ka miratuar sot planin e përgjithshëm vendor të Tiranës.
Në këtë plan, mes projekteve të tjera, parashikohet edhe ndëtimi i një kulle pranë “Hotel Tirana International”.
Leja e miratuar nga KKT-ja parashikon “Zgjerim të kapaciteteve akomoduese e shërbimeve të Hotel Tirana International, me shtesë anësore dhe kullë me destinacion Hotel dhe qendër multifunksionale tregtare e shërbimesh”.
Qeveria i hapi rrugë, pak ditë më parë, ndërtimit të një kulle tjetër rreth 350 metra e lartë, që do ndërtohet nga një kompani nga Dubai, në bulevardin e ri të Tiranës.
Plani i Përgjithshëm Vendor, që projekton Tiranën 030, Tiranën e së ardhmes si një hapësirë europiane, parashikon në total 13 projekte strategjike që përbëjnë dhe komponentin kryesor të planit.
Më konkretisht parashikohet: Projekti i Pyllit Orbital; Projekti i Oazëve natyrorë; Unaza e 2 dhe e 4; Projekti i Parkut Botëror; Unazat e gjelbra dhe blu; Epiqendrat e Tiranës policentrike; Shkollat e hapura; Ruajtja e pasurisë arkitektonike të shekullit XX; Sistem i ri bujqësor dhe rrjet i ri i tregjeve për fermerët; Transporti me cilësi të lartë; Rrjeti i korsive dhe mobiliteti; Tirana për të gjithë, qytet i aksesueshëm. Plani parashikon, ndër të tjera, edhe një investim në energjinë e rinovueshme në të ardhmen. Plani i Përgjithshëm Vendor bazohet në idenë e ruajtjes së godinave historike, si një element i domosdoshëm për të kuptuar historinë e Shqipërisë dhe Tiranës.
