Virgil Van Dijk u bë mbrojtësi më i shtrenjtë në historinë e futbollit, kur kaloi nga Southampton tek Liverpool. Holandezi me këtë transferim ka thyer rekordin si transferimi më i shtrenjtë i një mbrojtësi që është bërë ndonjëherë, për plot 84.5 milionë euro. Rekordin deri atëherë e mbante transferimi i David Luiz nga Chelsea te PSG në vitin 2014.
Por e justifikoi holandezi këtë shumë të paguar për të në fushën e blertë? Statistikat thonë se po. Livrpool para ardhjes së tij kishte një mbrojtje të brishtë dhe pësonte shumë gola. Ndërsa me Van Dijk, Klopp ka krijuar një mbrojtje solide, duke e çuar Liverpool deri në finalen e Champions League dhe këtë sezon është pretendenti kryesor për të fituar Premier League. Një trofe që mungon në Anfield prej shumë vitesh.
Van Dijk është me të vërtetë një shtyllë në mbrojte dhe askush nga sulmuesit nuk mund të përballet me të. Një statistikë e frikshme është se në 31 ndeshjet e fundit asnjë lojtar kundërshtar nuk ka arritur që ta driblojë atë. Kjo cilësohet nga mediat angleze si një statistikë e ‘çmendur’ që nuk ishte parë prej vitesh dhe e justifikon plotësisht guximin e Klopp për të paguar një shifër të tillë për një mbrojtës.
