Një përballje prekëse pas 20 vitesh mes babait dhe vajzës së braktisur. Është ky një nga momentet rrëqethëse të ndodhur mbrëmë në studion e emisionit “Dua të të bëj të lumtur”, ku Luan Buzi u përball me të bijën Xheni, e cila kishte vuajtur prej vitesh mungesën e të atit.
Ishte Erjola, vajza tjetër e Luanit që u përpoq të mundësonte një takim mes të atit dhe motrës së saj, duke i kërkuar asaj që t’i jepte atyre një mundësi për t’ia nisur nga e para.
Xheni e fali babanë e saj, por ajo gjatë gjithë kohës i kërkonte shpjegime Luanit se ku kishte qenë ai gjatë këtyre 20 viteve. Askush sipas Xhenit nuk kishte të drejtë ta ndante Luanin nga ajo dhe se çdo gjë që ai thoshte ishin vetëm justifikime. Për këtë arsye ajo nuk pranoi ta takonte Luanin, duke quajtur si baba të sajin burrin që e rriti, bashkëshortin e nënës së saj.
Ajo tha që e kishte falur dhe se çdo gjë kishte mbetur në të shkuarën, por nuk kishte dëshirë që të takonte babanë e saj biologjik. Xheni la të hapur mundësinë për të ndërtuar një urë komunikimi me dy motrat e saj.
