Vetëm pak ditë përpara hapjes së merkatos, autoritetet kineze miratuan masa mbrojtëse për akademitë e klubeve, që shpeshherë vuanin blerjet e yjeve nga Evropa.
Nëse do të blejnë lojtarë të huaj, që kushtojnë më tepër se 6 milionë euro, skuadrat e dy kategorive më të larta të futbollit në Kinë duhet të paguajnë një taksë me të njëjtën shifër të vlerës së paguar për kartonin.
Ndërkohë, për tregun vendas, tavani për blerjen e futbollistëve është 2,6 milionë euro.
Taksa e re është parashikuar të shkojë në një fond të dedikuar, për të financuar rritjen e futbollit kinez.
Me këtë ligj, praktikisht, çdo futbollist do të kushtonte dyfish.
Praktikisht nëse për afrimin e Oscar nga Chelsea te Shanghai Sipg investoi 70 milionë euro, me rregullat e reja, kosto e mesfushorit brazilian do të shkonte në 140 milionë euro.
Nëpërmjet këtyre masave, presidenti i Kinës, Xi Jinping, i cili është i apasionuar pas futbollit synon rritjen e nivelit të sportistëve në vend, edhe sepse mes objektivave të qeverisë popullore është organizimi i Botërorit 2030.
