Nisur nga zhvillimit të fundit këshilltarët e këshillit Bashkiak të qytetit të Kukësit dhe shoqëria civile, kanë dalë në një deklaratë për mediat. Kërkesa e tyre i drejtohet ambasadorëve të huaj, që të ndërhyjnë ndaj qeverisë shqiptare për arrestimin e protestuesve në Rrugën e kombit.
Në deklaratën e tyre, ata thonë se një vend si Shqipëria, pjesë e NATO-s dhe aspirant për në BE, nuk mund të sillet si shtet policor në prani të SHBA-ve.
“Një vend si Shqipëria, anëtare e NATO-s, që pret të hapë negociatat me BE-në nuk mund të sillet si një shtet policor nën dritën e diellit të Ambasadës Amerikane dhe përfaqësuesve të BE-së dhe vendeve të tjera të BE-së në Shqipëri.
Kjo është lutja e fundit e kuksianëve bujarë dhe mikëpritës, e treguar shumë qartë gjatë Luftës së Kosovës dhe shumë prej jush mund ta keni provuar në vatrat tona gjatë vizitave të shpeshta, të cilët kërkojnë nga ju që të dëgjoni hallet tona dhe të gjykoni sjelljen e papërgjegjshme të politikanëve tanë që ndëshkojnë të drejtën e qytetarëve për protestë.
Nuk duam asgjë më shumë sesa së bashku të kthejmë shpresën e fëmijëve tanë, të mund të jetojmë pa frikë e të barabartë përpara ligjit, të pyetemi dhe të merremi në konsideratë sepse jemi bashkëpronarë të këtyre trojeve të bukura e plot pasuri por në fakt po na e vjedhin me marifete e ligje të shpikura që nuk i kanë hije një vendi që do ti bashkohet familjes demokratike euro-atlantike.”
