Kompanitë publike të energjisë duket se kanë kaluar situatën e vështirë financiare për shkak të krizës që pësuan vitin e kaluar. Korporata elektroenergjetike shqiptare ka arkëtuar 2.86 milionë euro nga shitja e energjisë në eksport për të dyja javët në vijim. Sipas njoftimit zyrtar, KESH ka përfunduar kontratën për shitjen e 75 mijë megavat orë energji, e cila do të dorëzohet në periudhën 22 janar 4 shkurt.
Së bashku me energjinë e shituar para kësaj periudhe, Koorporata Elektoenergjitike Shqiptare ka grumbulluar mbi 5 milionë euro brenda një harku kohor prej 50 ditësh.
“Vitin e kaluar KESH, OSHEE dhe OST u përballën më krizë financiare për shkak të thatësirës së gjatë, që detyroi qeverinë të jepte rreth 50 milionë euro nga buxheti i shtetit për blerjen e energjisë nga eksporti dhe shlyerjen e borxheve të tre kompanive”-shkruan TCH
Bashkë me paratë e shpenzuara nga vetë, kompanitë energjetike, kryesisht OSHEE vitin e kaluar Shqipëria shpenzoi 200 milionë euro, ose mbi 1.5 për qind të prodhimit kombëtar për importin e energjisë, çka përveç tronditjes së financave të kompanive dhe buxhetit dëmtoi rritjen ekonomike.
Por këtë vit situata duket se ka ndryshuar tërësisht. Sipas të dhënave më të fundit zyrtare nga KESH niveli i ujit aktualisht në liqenin e Fierzë është 290 metra, ose 6 metra nën kuotën maksimale.
I gjithë konsumi i energjisë po furnizohet nga prodhimi vendas dhe në të njëjtën kohë KESH është duke shitur në eksport. Shitja e energjisë pritet të vazhdojë të paktën edhe për muajin tjetër për shkak se rezerva hidrike është në nivele maksimale, çka pritet të lehtësojë sadopak financat e drobitura të kompanive energjetike.
