Kërcënohet me jetë ministri i Jashtëm grek, Nikola Kotzias! Ky i fundit ka marrë një letër, ku kërcënohet me vdekje, ndërsa lajmi është bërë publik nga ministri i Mbrojtjes së Qytetarëve, Nikos Toskas.
Ai e zbuloi letrën kërcënuese teksa foli në ANT1, ndërsa tha se letra ishte anonime dhe në të mesazhi ishte i qartë.
“Ministri i Jashtëm Nikola Kotzias ka marrë një letër kërcënuese që i drejtohet atij dhe familjes së tij”, tha Toskas.
“Ne kemi tre plumba për ju”, thuhej ndër të tjera në letrën kërcënuese, drejtuar Kotzias.
Autoritetet greke kanë nisur hetimet për zbulimin e autorit, ndërsa ministri për Mbrojtjen e Qytetarëve e përshkroi letrën si ‘të papranueshme’ dhe i bëri thirrje pjesës tjetër të forcave politike të dënojnë veprime të tilla, siç tha ai, ‘është në interes kombëtar të ketë një klimë më të mirë’.
