Greqia dhe Maqedonia janë në garë me kohën për përfundimin e negociatave për zgjidhjen e çështjes së emrit, me qëllim që të marrëveshja e tyre të mbyllet para Samitit të BE-së që do të mbahet në fund të këtij muaji.
Gazeta greke ‘Kathimerini’ shkruan se 95 për qind të negociatave janë kompletuar dhe se mbeten disa detaje të rëndësishme para se marrëveshja të jetë e gatshme. Në qoftë se zhvillohet sipas planit, marrëveshja duhet të vendoset në Kuvendin e Maqedonisë para Samitit të BE-së, ndërsa në referendum, sipas të gjitha gjasave në muajin shtator.
Nëse marrëveshja ratifikohet në Kuvend, atëherë Athina, si pjesë e marrëveshjes mes dy palëve, do të dërgojë letër deri te BE dhe NATO për zhbllokimin e rrugës së Maqedonisë drejt këtyre strukturave, transmeton telegrafi.
“Letra greke do të jetë në lidhje me emrin e dakorduar, Republika Maqedonia e Veriut, Maqedonia e Epërme ose ndonjë emër i tretë që do të dakordohet. Nëse marrëveshja merr votë pozitive në referendum, atëherë do të hapet rruga për rishikim të Kushtetutës së IJRM, kërkesë kyçe e Greqisë. Në qoftë se referendumi nuk është i suksesshëm, dështon marrëveshja mes Shkupit dhe Athinës”, shkruan ‘Kathimerini’.
