Në gjysmën e parë të këtij viti, investimet e huaja u mbështetën kryesisht te energjia dhe industria nxjerrëse.
Sektori energjetik në 6 muaj solli 39% të totalit të investimeve të huaja, të cilat i takojnë kryesisht gazsjellësit TAP me afro 150 milionë euro të investuara në total.
Megjithatë, ky sektor ka pësuar rënie krahasuar me vitin e kaluar, kur siguronte më shumë se gjysmën e investimeve.
Gjithashtu, vihet re një rikthim i investimeve në industrinë nxjerrëse, me 106 milionë euro ose 28% të totalit.
Rritja e investimeve i detyrohet përmirësimit të çmimit të lëndëve të para dhe mbylljes së tranzicionit të shitblerjes në kompaninë më të rëndësishme të sektorit, Bankers Petroleum, shkruan Scan.tv.
Sistemi financiar solli 13% të totalit të investimeve të huaja në gjysmën e parë të këtij viti.
Sektori i fundit me peshë domethënëse në investimet e huaja ishte ai i aktiviteteve profesionale, ku peshën kryesore e zënë sipërmarrjet call-center, sektor ky që solli 42 milionë euro investime ose rreth 12% të totalit për 6-mujorin e parë të vitit.
Investimet e huaja direkte po shfaqin një tendencë pozitive, por, megjithatë është fakt se ato ngelen të përqendruara në pak sektorë, madje në pak ndërmarrje, ndërsa prej vitesh mungojnë projekte të reja me rëndësi.
