Interi ka marrë sërish një fitore shumë të vuajtur, këtë herë përballë Sampdorias në transferë. Janë shënuar katër gola, për të përfunduar ndeshja 1-0, pasi tre të tjerë janë anuluar. Dy gola të anuluar nga VAR ishin për zikaltërit, Nainggolan dhe Asamaho dërgojnë topin në rrjetë por festa u ndërpre. Ndërsa në minutat shtesë, ashtu si ndaj Tottenham, Interi shënon golin e vetëm të rregullt të takimit dhe ishte Brozovic heroi në këtë mbrëmje.
Ndeshja nis me një ritëm të lartë nga të dyja skuadrat, me Inter që rrezikon shumë me mënyrën se si nis aksionet nga mbrojtja pasi Sampdoria qëndron e pozicionuar lart dhe presioni është shumë i madh. Ndeshja kryesisht zhvillohet në mesfushë dhe vetëm në fund të pjesës së parë Inter tregohet i rrezikshëm me Nainggolan që shënon një gol që anulohet nga VAR për një pozicion jashtë loje.
Pas pushimit Inter shton presionin dhe Sampdoria zhduket, të paktën në sulm, dhe fokusohet vetëm te mbrojtja. Candreva mund të kishte shënuar por shtylla i mohon një goditje fantastike. Pak më vonë ishte portieri kundërshtar. Po ashtu edhe Icardi ka disa mundësi të mira me kokë por është i pafat.
Asamoah shënon në fund por ishte përsëri VAR ai që i mohon golin ekipit të Spalletti-t. Dhe si ndaj ndeshjes me Tottenham, Inter gjen golin e avantazhit me anë të Brozovic. Gjatë festimeve të golit, Spalletti futet në fushë dhe arbitri e ka dërguar në tribunë. Por diçka që nuk do t’i prishë humorin milanezëve që marrin tre pikë të arta.
