Katari do të ngrejë padi në gjykatën ndërkombëtare kundër Arabisë Saudite, Emirateve të Bashkuara Arabe dhe Bahreinit të cilat morën vendimin të parat për vendosjen e bllokadës diplomatike.
Ali bin Smaikh Al Merri, kreu i Komitetit Kombëtar për të Drejta e Njeriut pranë Qeverisë së Katarit, në konferencën për media njoftoi se do të hap proces gjyqësor në gjykatën ndërkombëtare për dëmshpërblim të shteteve anëtare të Këshillit për Bashkëpunim të vendeve të Gjirit Persik të cilat kanë ndjerë pasojat e mbylljes së hapësirës ajrore të Katarit dhe bllokadës që Arabia Saudite, Emiratet e Bashkuara Arabe dhe Bahreini kanë vendosur.
Merri, vendimin e bllokadës e quajti “dënim masiv dhe krim ndërkombëtar”, dhe shtoi se komiteti deri tani ka pranuar 700 ankesa dhe është përballur me probleme tragjike familjare, shkruan gazeta turke SABAH.
Ai shtoi se ka biseduar me organizatat për mbrojtjen e të drejtave të njeriut në Arabinë Saudite, Emiratet e Bashkuara Arabe dhe Bahrein dhe ka kërkuar prej tyre veprim të shpejtë për të garantuar dhe ruajtur të drejtat e shtetasve të Katarit në këto vende, por edhe në vendet e tjera të cilat kanë njoftuar bllokadë kundër saj.
Arabia Saudite, EBA, Bahreini, Egjipti dhe Jemeni më 5 qershor njoftuan se kanë ndërprerë marrëdhëniet diplomatike me Katarin.
Bahreini, Arabia Saudite dhe Emiratet e Bashkuara Arabe kanë mbyllur hapësirën ajrore për Katarin dhe u kanë dhënë 48 orë afat shtetasve kataras për t’u larguar nga vendet e tyre. Përveç kësaj, Arabia Saudite ka mbyllur edhe të vetmin kufi tokësor me Katarin.
