Mijëra njerëz kanë protestuar në rrugët e Katalonjës, duke kundërshtuar ndalimin e dy udhëheqësve separatistë.
“Presioni nuk është zgjidhje”, këndonin në kor mijëra protestues, të cilët u mblodhën jashtë zyrave të qeverisë rajonale katalane në Barcelonën qendrore.
Protesta erdhi pas urdhrit të Gjykatës Kombëtare në Madrid për ndalimin e Jordi Cuixart dhe Jordi Sanchez, të cilët u ndaluan nën akuzat për organizimin e kryengritjes.
Më 17 tetor, Gjykata Kushtetuese e Spanjës vendosi që ligji i miratuar në Katalonjë, që i hapi rrugën referendumit për pavarësi më 1 tetor, nuk ishte i vlefshëm.
Gjykata tha në një deklaratë se 12 gjyqtarët e saj “unanimisht” kishin shpallur jokushtetues ligjin e referendumit.
