Ndërtimi i HEC-ve në kanionet e Osumit ka vënë në lëvizje të gjithë strukturat shtetërore, ndërsa kjo çështje nuk ka kaluar pa ndjesë publike. Kryeministri Rama tha se ky është një gabim dhe nuk do të lejohet ndërtimi i tyre në zonat e mbrojtura.
Ai tha se ka një gabim në përcaktimin e koordinatave, por në zonat e mbrojtura nuk do të lejohet të ngrihen HEC-e. Ministri i Infrastrukturës dhe Energjisë, Damian Gjiknuri, ka folur në lidhje me këtë çështje, e cila është shoqëruar me sensibilitet të lartë shoqëror, ndonëse nuk kanë munguar sulmet qytetare në media sociale.
Por ministri, i cili duhet të jetë më në brendësi të çështjes shprehet se nuk ka dijeni në lidhje me manipulimin që mund të jetë bërë në lumin Osum. Ai është shprehur se leja e ndërtimit është dhënë në vitin 2016, ndërsa vlerësimi i tij në mjedis është bërë nga agjencitë përkatëse.
Ndërkohë ministri Gjiknuri tha se nuk do të lejohet t ndërtohet në zonat e mbrojtura, por sipas tij, nëse ka një devijim të koordinatave gjithçka do të trajtohet si e pavlefshme.
“Leja e ndërtimin është dhënë në 2016. Ka një pretendim nga Ministria e Mjedisit dhe jemi shprehur që nëse ka koordinata të rreme apo të dhëna te falsifikuara ka të drejtën të revokojë vendimet e dhëna nga KKRT-ja. Projekti nuk ishte në zonë të mbrojtur. Janë hedhur shumë spekulime, dhe t’i sqarojmë. Projekti nuk devijon ujëvarë, por vazhdon siç ka qenë. Unë nuk e di për çfarë projekti të manipuluar flitet. Unë di të dhënat për të cilat ka folur ministri i Mjedisit, dhe unë besoj se do vijohet në këtë drejtim deri në zbardhjen e plotë të rastit. Kam besim që Ministria e Mjedisit do t’i shkojë deri në fund çështjes. Sipas dokumenteve që kanë sjelle Agjencitë përkatëse të mjedisit, nuk ka probleme të tilla. Tashme i takon agjencive të mjedisit ta zbulojnë këtë. Unë flas për rolin e Ministrisë së Infrastrukturës dhe Energjetikës. Ky institucion nuk bën vlerësime mjedisore, këtë e bën një institucion tjetër”-tha Gjiknuri.
