Mbrojtësi i krahut të majtë të kombëtares shqiptare, Naser Aliji prej disa muajsh u largua nga futbolli profesionist. Atë e detyroi një dramë familjare që ta merrte këtë vendim, duke mos pranuar të angazhohej me ndonjë klub në merkaton e verës së këtij viti.
Por tashmë Aliji ka vendosur që të zbresë sërish në fushë dhe ofertat për të nuk mungojnë, është skuadra e Dinamo Bucureşti që kërkon shërbimet e tij. Gjiganti rumun është mjaft i njohur për shqiptarët, pasi aty ka shkëlqyer një shqiptar tjetër, Sulejman Demollari.
Për momentin, Dinamo Bucureşti është në një pozicion mjaft delikat në klasifikimin e “Liga I” të Rumanisë. Më konkretisht, ajo pozicionohet e 12-ta nga 14 skuadra gjithsej, sepse ka grumbulluar vetëm 8 pikë në 13 ndeshje të luajtura. Përforcimet janë shpresa e trajnerit Mircea Rednic për të dalë nga zona e ftohtë e mbijetesës.
Mediat rumune e bëjnë me dije këtë fakt. Ato shkruajnë: “Pas portierit Logan Bailly dhe mbrojtësit Sebastien Locingni, Mircea Rednic ka rënë dakord me një futbollist të tretë, që do të nënshkruajë me Dinamon. Bëhet fjalë për 24-vjeçarin Naser Aliji, mbrojtës i krahut të majtë, i kombësisë shqiptare dhe zvicerane.
I dalë nga FC Basel, Aliji do të vijë në Bukuresht si lojtar i lirë. Herën e fundit ai luajti për Virtus Entella. Aliji nuk ka angazhim me ndonjë skuadër që nga vera, kur i vdiq i ati dhe ai preferoi të qëndronte pranë familjes. Për ekipin kombëtar të Shqipërisë, ai ka luajtur 11 ndeshje. 400 mijë euro është vlera e tregut e Naser Alijit, sipas “transfermarkt”.
