Prej tre muajsh, dhjetëra familje në Lezhë nuk kanë marrë ndihmë ekonomike, si pasojë e mosmbledhjes së Këshillit Bashkiak.
Për këtë arsye, ata kanë protestuar sot përpara Bashkisë së Lezhës, ku kërkojnë që t’u jepet sa më shpejt ndihma ekonomike, pasi janë detyruar të hyjnë në borxhe për bukën e gojës.
“Prej tre muajsh ne s’e kemi marrë ndihmën ekonomike. Nuk e kuptoj pse na sorollasin sa në një zyre në tjetrën. Ne po vdesim për bukën e gojës, s’na jep askush më borxh, pasi lista ka shkuar shumë e gjatë. E vetmja e ardhur për familjen time është ndihma ekonomike, pasi të gjithë jemi të papunë. Kryetari i Bashkisë vetëm erdhi e mori votat, tani as nuk do t’ia dijë për ne. Kemi tentuar disa herë për ta takuar, por as në bashki s’na lënë të hymë”, thotë një qytetare në nevojë, shkruan tesheshi.com.
Drejtori i Shërbimit Social, Jak Pjetri, tha se “topi” është në anën e Këshillit Bashkiak, të cilit i bëri thirrje që të mblidhet sa më parë.
