Kandidatja e Partisë Socialiste në listat e hapura për qarkun e Tiranës, Blerina Gjylameti, ka folur mbi sfidat e një gare elektorale, duke theksuar se gratë përballen me më shumë vështirësi gjatë një fushate.
Në një prononcim për mediat, Gjylameti tha se sistemi i listave të hapura e bën edhe më të ndërlikuar fushatën, pasi kandidatët duhet të punojnë në të gjithë qarkun për të siguruar votat individualisht.
“Nuk është e thjeshtë të bësh fushatë, jo vetëm si pjesë e listës së hapur, por edhe si grua. Nuk ka beteja elektorale të lehta dhe nuk është një proces automatik. Duhet të japësh llogari për çfarë ke bërë dhe të fitosh besimin për atë që do të bësh.”
Gjylameti shtoi se puna e saj e gjatë në Partinë Socialiste i ka dhënë mundësinë të krijojë lidhje të shumta me qytetarët, të cilat mund të përkthehen në mbështetje elektorale.
“Puna më ka bërë të njoh shumë njerëz dhe jam mirënjohëse për mbështetjen e tyre. Besoj se kam lënë një emër të mirë, që mund ta kthej në një mbështetje për veten time në këto zgjedhje.”
Kandidatja socialiste u shpreh optimiste për rezultatin e fushatës dhe theksoi se synimi i saj është të vijojë angazhimin për qytetarët e Tiranës.
