E përditshmja “Le Monde” dhe radioja publike franceze raporton se Franca do të ndalojë protezat e silikonit.
Implanti i gjoksit, një fenomen tashmë popullor, mësohet se shkakton një formë të rrallë të kancerit. Kjo ka sjellë edhe reagimin e shtetit Francez, i cili ka dërguar një letër prodhuesve të këtyre implanteve nga autoritetet shëndetësore.
Në një vendim të cilësuar “historik”, Agjencia Kombëtare e Mjekësisë dhe Produkteve Shëndetësore të Francës, “ANSM” i ka njoftuar më 2 prill prodhuesit mbi planet e saj për të ndaluar “prodhimin, shpërndarjen, import-eksportin, promovimin dhe mbajtjen e implanteve me veshje poliuretani”, raporton Top Channel.
“Le Monde” e publikoi letrën në faqen e saj të internetit. Në shkrim agjencia thekson një ‘rrezik të rrallë’, por edhe shumë serioz që mund të shkaktohet nga implantet e lidhura me limfomën anaplastike me qeliza të mëdha (BIA-ALCL), një formë e rrallë e sëmundjes së kancerit.
“ANSM” e ka ndjekur ecurinë e mbajtëseve të protezave të gjirit që nga viti 2011. Mësohet se më shumë se 500 mijë femra të cilat kanë bërë ndërhyrje me implante silikoni në këtë vend, kanë sipërfaqe më të ashpër, kjo si pasojë e veshjes prej poliuretani që përdoret për të shmangur rrëshqitjen jashtë pozicionit.
Franca ishte në qendër të një skandali të madh në vitin 2010, kur rezultoi se krijuesi i një marke popullore implantesh i kishte mbushur me një xhel silikoni të lirë industrial, i cili ishte më i rrezikshëm për përdorueset sesa silikoni mjekësor.
