Italianët festuan me entuziazëm për ekipin e tyre kombëtar që fitoi titullin e Euro 2020, ndërsa lojtarët u mirëpritën të hënën nga Presidenti Sergio Mattarella dhe Kryeministri Mario Draghi.
“Sot nuk është një ditë fjalimesh, por duartrokitjesh dhe mirënjohjeje,” tha Mattarella.
“Ju e meritonit të fitonit mbrëmë sepse kishit dy disavantazhe të rënda: që luanit në shtëpinë e kundërshtarëve në një stadium si Uembli dhe golin e ftohtë që do të kishte gjunjëzuar këdo”, shtoi ai, duke iu referuar goditjes së Luke Shou në minutën e dytë të lojës.
Trajneri Roberto Mancini dhe lojtarët e tij pozuan për foto me Mattarellan së bashku me trofeun e Euro 2020.
“Është një nder të jem këtu,” tha Mancini. “Kjo fitore është provë se kur beson fort në atë që bë, mund ta ndjekësh ëndrrën. Ne ia kushtojmë këtë fitore italianëve të cilët më në fund do të jenë në gjendje të festojnë me ne”.
Pas takimit me Presidentin Mattarella, ekipi italian u drejtua për në Palazzo Chigi, ku u takuan me Kryeministrin Draghi.
“Sot sporti lë një gjurmë të pashlyeshme në historinë e kombeve. Sot ju jeni ata që bëtë histori, me vrapimet tuaja të shpejta, shërbimet tuaja, goditjet tuaja dhe pritjet tuaja,” tha Draghi.
Duke parë portierin Gianluigi Donnarumma, ai shtoi: “Dhe çfarë pritjeje”.
Mijëra njerëz dolën në rrugët në të gjithë vendin pasi Italia mundi Anglinë 3-2 me penallti duke fituar trofeun në Uembli, të dielën vonë, për titullin e tyre të dytë kontinental./ Tirana Today
