Marius Vrushaj është një nga talentet me origjinë shqiptare më në zë të momentit. Pak ditë më parë ai u transferua në kampionatin hollandez, nga skuadra e Olimpiakosit tek ekipi i Willemit II. Pikërisht me këta të fundit, Vrushaj bëri edhe debutimin e tij, teksa arriti edhe të shënonte. Një debutim ky që nuk kishte si të shkonte më mirë për mesfushorin, ku u aktivizua në minutën e 75 dhe realizoi në minutën e 92, duke dyfishuar shifrat për skuadrën e tij të re.
Mbiemri! Në fanellë shkruhet Vrousai, pasi lojtari 20-vjeçar ka luajtur më parë me moshat e Greqisë, megjithëse gjasat janë që të zgjedh Shqipërinë. Në Holandë e thirrën “Broesai”, me shkronjën B. Në lidhje me këtë histori, ka qenë vetë Vrushaj që e ka shpjeguar për mediat brenda klubit të Willem II, që luan në elitën e “Eredivisie”.
“Unë kam një emër dhe mbiemër shqiptar. Me shtetësi greke, por unë kam lindur në Shqipëri, andej nga më vijnë edhe prindërit. Kur isha tre vjeç, shkuam në Greqi. Gjithashtu më duhet të mësoj gjuhën holandeze. Kam kaq pak kohë këtu, saqë nuk di asnjë fjalë të vetme. Javën tjetër është projektuar edhe kursi im i parë të mësuar edhe gjuhën”, u shpreh Vrushaj që jep shpresa për një bashkim me Kombëtaren.
