Shtete të ndryshme kanë ngjyra të ndryshme në pasaporta, të cilat janë në 4 variante: të kuqe, blu, jeshile dhe e zezë.
Por, a e dini cfarë kuptimi ka secila ngjyrë?
Pasaporta me ngjyrë të kuqe është më e zakonshmja, pasi kjo ngjyrë është e përzgjedhur zakonisht nga shtete që kanë ose kanë pasur një sistem komunist. Qytetarët e Sllovenisë, Kinës, Serbisë, Rusisë, Latvias, Rumanisë, Polonisë dhe Gjeorgjisë kanë pasaporta të kuqe. Shtetet anëtare të BE-së, veç Kroacisë, përdorin pasaportë ngjyrë vishnje me nuanca të kuqe. Shtetet kandidate për hyrjen në BE, si Turqia, Maqedonia dhe Shqipëria, e ndryshuan ngjyrën e pasaportës në të kuqe para pak vitesh.
Pas të kuqes, pasaporta më e përhapur është ajo ngjyrë blu, e cila simbolizon “botën e re”. 15 shtetet e Karaibeve kanë pasaportë ngjyrë blu. Brenda bllokut te vendeve të Amerikës së Jugut, pasaportat ngjyrë blu simbolizojnë lidhjen me Merkozurin (një sindikatë). Kjo përfshin shtete, si: Brazili, Argjentina dhe Paraguai. Venezuela bën përjashtim, ajo në fakt i përket kësaj lidhjeje, por qytetarët e saj kanë pasaportë të kuqe. Pasaportat e qytetarëve amerikanë u bënë blu, në vitin 1976.
Shumica e vendeve islame kanë pasaporta ngjyrë jeshile. Të tilla janë Maroku, Arabia Saudite dhe Pakistani. Ngjyra jeshile konsiderohet si ngjyra e preferuar e Profetit Muhamed dhe është një simbol i jetës dhe natyrës. Qytetarët e disa vendeve të Afrikës Perëndimore, si: Nigeria, Senegali etj., kanë dokumente udhëtimi me ngjyrë që janë nuancë e jeshiles. Në këtë rast, ngjyra nënkupton që këta qytetarë i përkasin ECOWAS (Komuniteti Ekonomik i Shteteve të Afrikës Perëndimore).
Pasaportat e zeza janë më të rrallat. Ato gjenden në disa vende të Afrikës, si: Zambia, Kongo, Angola, Burundi, Malavia etj. Edhe qytetarët e Zelandës së Re kanë pasaporta të zeza, sepse ngjyra e zezë është ngjyra kombëtare e këtij shteti.
