Takimi midis Anjelit dhe Kielinit, merkatoja e Juventusit varet nga e ardhmja e kapitenit
Me kontratën që i skadon në fund të sezonit, Xhorxhio Kielini ende nuk ka gjetur qartësi për fatin e tij. Kapiteni i Juventusit dha kontribut në 24 ndeshje këtë vit dhe mund ta bëjë dhe të dielën në mbrëmje në Bolonjë në ndeshjen e fundit të kampionatit. Ndërkohë, megjithë pasiguritë, vendimi i tij për të ardhmen duket se tashmë është marrë por po pret përgjigje nga drejtuesit e klubit.
Dje, siç raporton ‘Gazzetta dello Sport’, ka pasur një takim ndërmjetësues midis Kielinit dhe Andrea Anjelit, gjatë së cilit do të diskutohej në mënyrë të pashmangshme e ardhmja e mbrojtësit. Xhorxhio do të donte të vazhdonte të luante dhe për një vit tjetër, me Juventusin apo edhe diku tjetër. Kështu, në rast të mosarritjes së një rinovimi, dyert e MLS-së mbeten të hapura. Duke pasur në plan rinovimin e skuadrës, klubi, nga ana e vet, vazhdon vlerësimet e tij. Për momentin lamtumira duket të jetë hipoteza më e mundshme.
