Në “Juventus Stadium” do të luhet ndeshja e parë e çerekfinaleve të Championsit, mes Juventusit dhe Barcelonës, por mbrëmjen e djeshme, atëherë kur stërvitja e katalanasve ende nuk kishte përfunduar zyrtarisht, shumë gjëra nisën të dilnin nga rutina e një stërvitjeje.
Pique luante me fëmijët, dikush jepte intervista për televizionet e pranishme, ndërsa lojtarë të tjerë pritën vizitorë. As Messi nuk ishte në fushën e blertë, por kishte dalë jashtë të fliste disi gjatë me një mik të vjetër, i cili ndonëse tashmë luan për Torinon, shumë vite më parë ka veshur edhe ngjyrat “blaugrana”.
Maxi Lopez ka luajtur me Barcelonën, në vitet 2005-2006, por raportet e tij me Messin dhe Iniestën duket se kanë mbetur të forta. Përpara se të mbërrinte në Itali, ai kaloi një periudhë të shkurtër te River Plate, ku luante në atë kohë edhe Javier Mascherano, e miqësia me këtë të fundit është gjithashtu e fuqishme.
Më shumë se me të gjithë, me të cilët ka shkrepur edhe një foto, biseda duket se ka zgjatur me Messin, ndoshta për të diskutuar mbi shkarkimin e mundshëm të trajnerit Bauza të Argjentinës.
Por për mediat italiane, takimi i sulmuesit të Torinos me Messin dhe me kapitenin “moral” të “Seleccion”-it, Mascheranon, ka aludime se dje në mbrëmje është diskutuar edhe mbi mosgrumbullimin e Mauro Icardit në kombëtaren argjentinase. Sipas thashethemeve, në qendër të këtij problemi qëndron Wanda Nara, ish-bashkëshorte e Maxi Lopez, tashmë në krahët e sulmuesit të Interit.
Bauza nuk ka dhënë kurrë shpjegime se përse Icardi lihet jashtë grumbullimeve, por mbetet të shohim nëse trajneri i ri i Argjentinës mund të ndryshojë ndonjë gjë, ose dje në “Juventus Stadium” është rivendosur “pakti” mes miqve të vjetër Maxi-Leo-Masche, kundër interistit.
