Anthony Joshua disa ditë më parë kishte shprehur dëshirën, për të unifikuat titujt e kampion bote për pesha të rënda në boks dhe të mbahej mend gjatë në histori. Boksieri anglez këtë mendon ta arrijë duke mposhtur edhe dy rivalët që mbajnë tituj që ai pretendon që ti fitoj. Aktualisht Joshua ka në pronë titujt e botës në versionet WBA dhe IBF në peshën e rëndë, por po planifikon të luftojë me zelandezin Joseph Parker, që është kampion në WBO dhe amerikanin Deontay Wilder që është kampion në WBC.
Duket se ëndrra e tij do të bëhet realitet, ose më saktë do ti jepet mundësia të përballet me këta boksierë. Joshua ka nisur kontaktet me zelandezin Joseph Parker dhe janë shumë pranë nënshkrimit të një kontrate për të zbritur në ring. Këtë gjë e ka konfirmuar menaxheri i boksierit anglez, Eddie Hearn. Joshua pritet të marrë 65% të fitimit, ndërsa Parker 35%, një përqindje që duket se kënaq të dyja palët. Ndërkohë që, sfida mes tyre pritet të zhvillohet në muajt e parë të 2018-ës. Nuk dihet ende se ku do të zhvillohet përballja edhe pse neo-zelandezi pritet të pranojë ofertën për të dueluar në Britaninë e Madhe.
“Jemi shumë pranë marrëveshjes, madje kanë mbetur vetëm disa detaje për t’u zbardhur. Së shpejti do të zhvillojmë një konferencë shtypi, ku do të sqarojmë të gjitha detajet. Negociatat janë ende duke u zhvilluar, por besoj se do të mbyllen këtë javë dhe do të kemi një marrëveshje të firmosur. Më vjen mirë që gjërat po qartësohen, pasi kjo është diçka e mirë, për të unifikuar titujt kampionë, ashtu sikurse dëshirojnë të gjithë”, u shpreh Eddie Hearn. Parker mban titullin kampion bote të kategorisë WBO, ndërsa Joshua mban titujt kampionë bote në kategoritë IBF dhe WBA, ndërkohë që të dy boksierët janë të pamposhtur në ring.
