Senatori amerikan dhe ish-kandidati për president i Shteteve të Bashkuara të Amerikës, John McCain, të enjten do të marrë pjesë në një seancë solemne në Kuvendin e Kosovës.
Senatori McCain, pas qëndrimit fillimisht në Serbi, ku u takua me presidentin e ri, Aleksandar Vuçiç, do të vizitojë edhe Kosovën në kuadër të një turi rajonal.
Në Serbi, senatori McCain ka kërkuar nga Vuçiç që të vazhdohet dialogu me Kosovën. Të njëjtën gjë pritet të kërkojë edhe në takimet që do të zhvillojë me politikanët kosovarë.
