Komisioneri për fqinjësinë dhe negociatat e zgjerimit, Johannes Hahn, është shprehur se hapja e negociatave me Shqipërinë mund të arrihet nëse kriteret e përcaktuara nga Brukseli do të trajtohen në një mënyrë inkurajuese dhe do të prodhojnë rezultate positive.
Hahn, tha se për të pasur një raport sa më të kompletuar duhet parë se çfarë arrihet deri në tetor-nëntor nga plotësimi i pikave kyçe për shqiptarët.
“Së pari, ne do shohim zgjedhjet dhe shpresoj të kemi një raport pozitiv nga ODHIR, së dyti një fillim të besueshëm të procesit të Vettingut dhe së treti luftë të efektshme në luftën kundër drogës. Ne duhet të shohim se ç’mund të arrihet deri në tetor-nëntor, pasi duhet t’u raportojmë vendeve anëtare.
Ajo që është e rëndësishme është cilësia e reformave dhe jo shpejtësia. Të krijosh presion në kohë, ndoshta ndihmon si nxitje kundrejt disave, por nga ana tjetër nuk përbën dallim thelbësor nëse ne e bëjmë në nëntor apo janar, aq më tepër nëse kemi më shumë siguri në janar që po shkojmë drejt një rezultati pozitiv që mbështetet nga shtetet anëtare”, u shpreh Hahn për ABC News.
Sipas tij, nuk është thjesht qëllimi i paraqitjes së raportit gjatë këtij procesi por është garancia që ai do të marrë nga vendet anëtare.
