Mesut Ozil u largua mjaft i zhgënjyer nga kombëtarja e Gjermanisë, ndarja ishte e hidhur dhe me një lum akuzash për racizëm që lëshoi turko-gjermani në drejtim të Federatës dhe drejtuesve. Gjithçka nisi nga ajo foto e shkrepur në Londër me presidentin e Turqisë, Erdogan dhe për faktin që Ozil nuk foli asnjëherë për tu sqaruar para mediave.
Më pas ishte dhe një Botërorë zhgënjyes ku Gjermania nuk arriti të kalonte as grupet dhe presioni ishte më i madh, pasi tifozët e vërshëllyen dhe e akuzuan se nuk e ndjente fanellën. Sot kombëtarja gjermane vazhdon të jetë nën drejtimin e Joachim Low, pavarësisht dështimit në Rusi dhe trajneri ka publikuar listën e lojtarëve që janë ftuar për në Ligën e Kombeve.
“Deri më sot, Mesut nuk më ka telefonuar. Nuk ka folur me mua!” Kështu ka thënë trajneri i kombëtares gjermane, Joachim Löw, gjatë një konference për shtyp në Mynih të Bavarisë, duke folur për herë të parë në lidhje me vendimin e Ozil për t’i dhënë lamtumirën kombëtares gjermane.
“Ai ka marrë vendimin e tij dhe unë duhet ta pranoj, pranoj se nënvlerësuam shumë impaktin që do të kishte rasti Ozil në shtyp sepse ishim të përqendruar te Botërorit. Me akuzat për racizëm Mesut i komplikoi shumë gjërat. Nuk ka pasur kurrë akuza apo deklarata raciste në ekipin tonë dhe ai e di mirë. E ekzagjeroi me atë që tha. Na dëmtoi ne, por dëmtoi edhe veten e tij.”
