Presidenti amerikan Donald Trump la të hapur të mërkurën mundësinë për të urdhëruar vendosjen e Gardës Kombëtare dhe anëtarëve të shërbimit federal të imigracionit (ICE) në New Orleans me qëllim luftimin e krimit, siç kishte bërë së fundmi në Uashington.
Duke folur me gazetarët në Shtëpinë e Bardhë, Trump tha se administrata e tij po shqyrtonte nëse do të vendoste forca në Çikago apo diku tjetër “…si New Orleans”.
“Ndoshta në Luiziana, ku New Orleans ka një problem me kriminalitetin”, tha presidenti amerikan, duke shtuar se “do ta zgjidhim brenda rreth dy javësh”.
Ai tha gjithashtu se krimi në Baltimore është në “nivele që askush nuk i ka parë më parë” dhe se do të merrte në konsideratë vendosjen e forcës ushtarake atje nëse do t’i kërkohej. “Nëse ndërhyjmë në Baltimore, mund ta zgjidhim shumë shpejt (problemin e krimit)…Mendoj se po presim derisa të na kërkohet”, tha Trump.
Pas Los Anxhelosit dhe Uashingtonit, presidenti republikan po kërcënon të dërgojë agjentë të Gardës Kombëtare dhe ICE në disa qytete të mëdha të kontrolluara nga demokratët, duke përmendur nevojën për të goditur krimin edhe pse zyrtarët lokalë raportojnë se vrasjet, dhuna me armë dhe vjedhjet me thyerje kanë rënë.
