Ministri i Shëndetësisë në Kosovë, Arben Vitia, deklaroi se qeveria i ka kërkuar Shqipërisë që t’ua mundësojë vaksinimin anti-covid të mësuesve nga Kosova.
Ai bëri të ditur se Shqipërisë i kishin mbetur vetëm vaksina Sinovac nga Kina, dhe nuk kanë dashur që mësuesit kosovarë të marrin ato doza.
Vitia sqaroi se ligjet e Kosovës nuk e lejojnë që vendi të importojë një produkt të paregjistruar në EMA.
”Numri i vaksinave Pfizer dhe AstraZeneca kanë mbaruar në Republikën e Shqipërisë dhe kanë ngelur vetëm vaksinat Sinovac me prodhim nga Kina. Për arsye se në Republikën e Kosovës ne edhe po të donim, na ndalojnë ligjet që të importojmë produkte që nuk janë të regjistruara në EMA dhe në këtë situatë, ne nuk e kemi parë të arsyeshme që mësimdhënësit tanë të vaksinohen me vaksinat të cilat ne nuk mund të garantojmë për to. Kjo është arsyeja pse është shtyrë procesi”, ka theksuar ai.
Ndër të tjera, Vitia u shpreh se ministrja e Shëndetësisë në Shqipëri, Ogerta Manastirliu i ka thënë se vaksinimi i mësuesve kosovarë do të shqyrtohet sërish.
