Zgjatja e pasigurisë politike në vend mund të ndikojë në ekonominë e vendit. Kështu është shprehur kreu i Fondit Monetar Ndërkombëtar në Tiranë, Jens Reinke.
Ky i fundit tha në një intervistë për BalkanWeb se deri më tani ekonomia ka shkuar mirë, por mund të ndryshojë në vazhdim për shkak të krizës politike në vend:
“Zgjatja e pasigurisë politike mund të bëjë që individët dhe firmat të rishikojnë vendimet e tyre për investime. Gjërat deri tani duket se janë në rregull, pasi po ecin ashtu siç pritej, por gjithmonë ekziston rreziku që zgjatja mund të ketë ndikim.”
I pyetur nëse është i realizueshëm programi i Partisë Socialiste për hapjen e vendeve të reja të punës dhe rritjen e pagave, Reinke tha se preferon të mos komentojë mbi platformat elektorale, pasi sipas tij, është detyra e publikut shqiptar që të gjykojë platformat e partive.
“Nuk dua të komentoj në fakt për platformat elektorale që partitë zgjedhin që të shfaqin gjatë kësaj kohe është detyra e publikut shqiptarë që të gjykoj mbi platformat e partive, ne presim që të bashkëpunojmë me qeverinë që do dali pas zgjedhjeve dhe atëherë do diskutojmë për politikat ekonomike”, tha kreu i FMN-së në Tiranë.
