Lorenc Jemini është ende i çuditur pse nuk vazhdon të gjykojë. Arbitri i njohur, i cili prej një dekade mban edhe stemën e FIFA-s, që prej sezonit të kaluar nuk gjykon në kampionatin shqiptar. Dje Jemini ka qenë i ftuar në emisionin “Procesi Sportiv” në televizionin “Top Channel”.
Edhe pse ka qenë disi i rezervuar në përgjigje konkrete për çështjen e tij, që ka mbetur enigmatike prej vetë institucionit të futbollit, 43-vjeçari sërish është munduar të hedhë dritë për atë që ka ndodhur. Ai tregon telefonatën me zyrtarët e FSHFsë, por edhe një “email” që i ka dërguar FIFA-s pak kohë më parë.
Lorenc, si ka nisur ky sezon për arbitrat?
Në çdo fillimsezoni mendoj se ka probleme, pasi edhe arbitrat vijnë nga një pushim dymujor. Sa të nxehen edhe ata, kanë pak nevojë për kohë. Gjithsesi, nuk ka nisur keq ky kampionat.
Prej muajsh nuk po gjykoni, ju kanë larguar apo jeni larguar…?
Më duket se kam vrarë veten (qesh). E çuditshme është që nuk gjykoj. Jam edhe në top formë, kjo është e keqja. Aq sa dini ju, di dhe unë.
OK, por zyrtarisht çfarë ju kanë thënë nga FSHF?
Kam marrë një pezullim. Më thanë je i pezulluar, por do të të kthejmë. Nuk ishte as me gojë, as me shkrim. Ka ardhur thjesht përmes telefonit, jo në rrugë zyrtare. Nuk më kanë thirrur për të më shpjeguar përse ka ardhur ky pezullim. Jam i çuditur për këtë situatë. Faktikisht vazhdoj të jem arbitër ndërkombëtar, sepse nuk jam njoftuar nga FIFA për pezullimin. Edhe FIFA komunikon në rrugë zyrtare, jo direkt me arbitrin.
Po ju dhurojmë një bilbil të vitit 1947…?
Bilbilin më duket se po ma dhuroni që t’i jap fund! (qesh).
Keni një marrëveshje kontraktuale me FSHF-në?
Arbitrat nuk kanë asnjë kontratë me FSHF-në, thjesht punojnë “part-time”. Gjithë bota ka kontrata, vetëm Mal i Zi dhe Maqedonia janë si puna jonë. Në çdo fillimsezoni bëhet kontrata dhe rinovohet vit pas viti, pasi bëhen testime fizike dhe teorike. Tani është futur edhe kontrolli i syve. Rasti im dhe i kolegëve të mi është për t’u çuditur.
Çfarë ka ndodhur në ndeshjen e fundit që keni gjykuar në kampionat?
Ndeshja që jam pezulluar unë, Partizani-Luftëtari, ka qenë një takim pa asnjë lloj historie. Ka fituar Partizani pastër 2-0 dhe nuk ka pasur asnjë problem. Kjo është e vërteta. Nuk po mendoj tani se çfarë kam bërë para një viti, por realisht ndeshja e fundit ajo është.
Keni pasur ndonjë komunikim me FIFA-n?
Në fakt, jam bërë kurioz dhe i kam dërguar një “email” FIFA-s. Atë, personin që ia dërgova, e njoh personalisht. Më ktheu një përgjigje me shumë xhentilesë: “Shiko se problemin e ke te Federata jote”.
Trajneri Shpëtim Duro ka thënë pas ndeshjes me Laçin se i përgatit lojtarët me idenë se arbitrin e kanë kundër. Si e shpjegoni?
Nuk më duket normale kjo. Trajnerët shqiptarë, pa i parë fare rastet në televizion, dalin direkt pas ndeshjeve dhe thonë na kanë mohuar 2 apo 3 penallti. Kjo nuk është normale, sepse pastaj kur i shikon rastet më mirë, çfarë mund të thuash kur del e kundërta?!
