Ish-kreu i diplomacisë evropiane, Javier Solana thekson se procesi i integrimit evropian të vendeve të Ballkanit Perëndimor po zvarritet. Ai shprehet se kjo vjen si pasojë e institucioneve të dobëta të këtyre vendeve por edhe mosmarrëveshjeve me Bashkimin Evropian.
Në një analizë të detajuar në “Project Syndicate”, (lexoni analizën e plotë) Solana shpjegon se mungesa e vëmendjes nga ana e BE-së ndaj Ballkanit Perëndimor po bën që vende si Shqipëria, Serbia, Kosova, Maqedonia, Mali i Zi të ndjekin modele të tjera autoritare që vijnë nga Lindja.
Sipas tij, Rusia dhe Turqia po ushtrojnë një ndikim të fortë në këtë rajon dhe për pasojë Bashkimi Evropian nuk ka mundur të parandalojë rrëshqitjen drejt autoritarizmit të Viktor Orban në Hungari.
I gjithë ky model politik, sipas Solanës, rrezikon të ndiqet edhe nga vendet e tjera të Ballkanit Perëndimor.
“Në të njëjtën kohë, normat dhe institucionet demokratike në Ballkanin Perëndimor, janë zbehur. Vende të tjera me ndikim të fortë në rajon – Rusia, Turqia dhe Hungaria, ku BE-ja nuk ka arritur të parandalojë një rrëshqitje drejt autoritarizmit nën kryeministrin Viktor Orban – po ofrojnë modele politike alternative, që mund të ndiqen nga vendet e Ballkanit Perëndimor”, shkruan Solana.
Ai këshillon Brukselin që të mbajë afër vendet e Ballkanit Perëndimor nisur edhe nga qëndrimi i dyzuar i Serbisë përballë BE-së dhe Rusisë, si dhe nga ndikimi i kësaj të fundit në politikën e Beogradit.
Solana vë në dukje se duke qenë se tregtia e vendeve të këtij rajoni, në përqindjen e saj më të madhe kryhet me BE-në, kjo e fundit nuk duhet të heqë dorë nga strategjia e saj ndaj Ballkanit. Ndërsa e cilëson si një hap pozitiv samitin e mbajtur muajin e kaluar midis BE-së dhe Ballkanit Perëndimor.
“Duke përjashtuar Kroacinë, 74 për qind e tregtisë totale së vendeve të Ballkanit Perëndimor kryhet me BE-në, krahasuar me vetëm 6 për qind me Kinën, 5 për qind me Rusinë dhe 4 për qind me Turqinë. Në këtë kontekst, Brukseli nuk duhet të lejojë që sfidat aktuale, të dobësojnë strategjinë e tij të përgjithshme të zgjerimit. Samiti BE-Ballkani Perëndimor muajin e kaluar, ishte një hap pozitiv, duke garantuar që vendet ende të etura për t’iu bashkuar unionit, të mos e lënë në harresë nevojën për të ndërmarrë reforma të thella. Të gjithë evropianëve, duhet t’u jepet mundësia të marrin pjesë në projektin evropian dhe të përfitojnë nga potenciali transformues i tij. Kjo është pikërisht ajo, që dëshiron ende një segment i madh i popullsisë ballkanike. Udhëheqësit e BE-së, nuk mund të garantojnë që procesi i anëtarësimit në bllok do të jetë i shpejtë dhe i lehtë. Por ata vetëm mund të sigurojnë që një rrugëtim i tillë ia vlen”, shkruan Solana në analizën e tij.
(TIRANA TODAY)
