Japonia kishte shansin e artë për të vazhduar aventurën në Botëror, pasi kryesonte 2-0 përballë Belgjikës, por në fund përmbyset gjithçka dhe ata nisen drejt shtëpisë. Por e rëndësishme ishte se ata u larguan me kokën lart dhe treguan një disiplinë dhe qytetari të madhe duke pastruar shkallët e stadiumit pas çdo ndeshjeje, diçka e pazakontë në stadiumet evropiane.
Ky zakon duket se nuk ishte vetëm tek tifozët, por kulturë e një populli, pasi edhe futbollistët japonezë kanë bërë një gjest të madh. Ata edhe pse të pikëlluar nga eliminimi e lanë dhomën e tyre të zhveshjes ashtu si e gjetën para se të largoheshin.
Aq mirë e kishin pastruar, sa fotoja duket sikur është bërë përpara se të niste ndeshja. Përveç kësaj, kishin lënë edhe një letër ku shkruhej “Faleminderit” në rusisht.
